Psalms 33

1Hlabelelani kuJehova ngentokozo, lina balungileyo; kubafanele abaqotho ukumdumisa.

2Dumisani uJehova ngechacho; mhlabeleleni ngesiginci sezintambo ezilitshumi.

3Mhlabeleleni ingoma entsha; tshayani kamnandi lihlokome ngentokozo.

4Ngokuba ilizwi likaJehova lilungile, liqinisile; uthembekile kukho konke akwenzayo.

5UJehova uthanda ukulunga lokwahlulela okuqondileyo; umhlaba ugcwele uthando lwakhe olungaphuthiyo.

6Ngelizwi likaJehova amazulu enziwa, unkanyankanya lwezinkanyezi ngomoya womlomo wakhe.

7Uyawaqoqa amanzi olwandle awathele ezindiweni; athululele izinziki zolwandle eziphaleni.

8Umhlaba wonke kawesabe uJehova; akuthi bonke abantu bomhlaba bazithobe phambi kwakhe.

9Ngokuba wakhuluma, kwahle kwaba khona; wayala, kwema kwaqina nko.

10UJehova uyawachitha amacebo ezizwe; uyazinyampisa izinhloso zabantu.

11Kodwa amacebo kaJehova ami aqinile nini lanini, izinhloso zenhliziyo yakhe kuzo zonke izizukulwane.

12Sibusisekile isizwe uNkulunkulu waso onguJehova, abantu abakhethayo baba yilifa lakhe.

13UJehova ukhangele phansi esezulwini ababone bonke abantu;

14esemzini wakhe uyababona bonke abahlala emhlabeni –

15yena owenza izinhliziyo zabo bonke, enanzelela konke abakwenzayo.

16Akulankosi esizwa yibukhulu bebutho layo; akulaqhawe eliphunyuka ngamandla alo amakhulu.

17Yikuthemba ize ukuthi ibhiza lingakusindisa; loba lona lilamandla amakhulu ngeke lisindise.

18Kodwa amehlo kaJehova akulabo abamesabayo, kulabo othemba labo lisethandweni lwakhe olungapheliyo,

19ukubakhulula ekufeni baphiliswe lanxa kulendlala.

20Simlindele uJehova ngokwethemba; ulusizo lwethu lesihlangu sethu.

21Izinhliziyo zethu zithokoza ngaye, ngokuba sithembe ebizweni lakhe elingcwele.

22Sengathi uthando lwakho olungaphuthiyo, Jehova, lungaba phezu kwethu njengalokhu sibeka ithemba lethu kuwe.
Copyright information for NdeIBE